"اخيرا خلصت من رسم حلمي" هذه كانت كلمات شاب عشريني امضى ايام و ليالي لرسم حلمه. رسمه بدقه و تفصيل ليحصل على افضل "رسم لحلم", ارخى لنفسه العنان و اخذ يسرح بخياله ليخرج بحلم فيه كل ما يتمنى اي شاب في عمره و بعد الرسم قرر الشاب ان يبدأ ببناء حلمه و تحويله من حلم الى هدف يصل اليه , ولكن لكي يبدأ بالبناء عليه تسجيل الحلم لدى دائرة "الاحلام المسقعات" , لم يتأخر الشاب فاتبع جملته الاخيرة بتنهيده و قال "بكرة من الصبح بنزل على دائرة "الاحلام المسقعات" عشان اسجل الحلم و ابلش ابني فيه " قام من مكتبه وارتمى على سريره وعلى محياه ابتسامة عريضة , اطفأ النور ونام.
استيقظ على رنين المنبه , استيقظ على غير العادة نشيطا سعيدا كله امل فاليوم سيسجل رسم الحلم الذي طال و هو يخطط و يرسم فيه .
ذهب صاحبنا الى موظف دائرة الاحلام المسقعات :
-"صباح الخير سيدي ."
-" صباح النور ... خير" وفي رده نوع من القرف من الملل الذي يشعر به .
-"والله جيت اسجل رسم هالحلم"
ابتسم الموظف ابتسامة تهكمية و قال "هات تا اشوف شو عندك " و عندما اخذ الرسم فاجئه قائلا
-"ولك شو هاظ"
-"رسم لحلم سيدي !!" و الشاب كله تعجب من رد الموظف .
-"شكلك اول مره بترسم حلم ؟!!."
الشاب بتعجب "ليش هوه كم مرة المفروض ارسم حلم , هو حلم واحد و بدي احققه".
تظهرابتسامة تهكمية اخرى على وجه الموظف يتبعها "شكلك جديد .. شوف يا حبيبي اول شي لازم تشيل من الجهة اليسرى للرسم ابو سنتين ثلاث "
قاطعه الشاب قائلا "بس ليش يعني انا ماخذ كل القياسات القانونية اني ما اضايق جاري و كمان خليت مسافة في حال اجا عا بالي اتوسع في الحلم اظلني محافظ على المسافة القانونية"
-الموظف"لا يا سيدي هاظ الحكي بس يكون جارك واحد زيك و بعدين افرض انه جارك اجا عاباله يتوسع بحلمه و يضايقك , اتضايقه انت وما تعطيه مجال يضايقك ؟؟!! ".
-"و شو بفرق جاري عني "
-"يا معلم جارك في ناس رسمولوه حلمه مش زيك , هو حلمه بنرسمله و بتحققلوا كمان ".
-"طب ما في حل !!!!".
-"لا والله غير هيك ما بزبط ..... و بعدين شو هاظ اللي مساوي في في المقدمة , يا حبيبي انت معتدي عل على حلم للامانة , شو رأيك تحلم عنها ".
-"انا قلت انه من حقي احلم ... بلكي صار اشي معي".
-"ولك تف من ثمك , ارسم زي ما بدك بس بعيد عن حلم الامانه سواء رح يتحقق او لا"
-"خلص يا سيدي بلاش منه هالحلم , انا اصلا مش ناقصني".
يتبع الموظف كلامه قائلا"وبعدين وين ختم مهندس الاحلام .. انشاءالله جايني من غير ما تمر عليه ؟؟؟".
-"ليش لازم امر على مهندس الاحلام..... ما انا اللي رسمت ؟؟".
-"حتى ولو .. لازم يختمها وبعد هيك راجعني " يرمي الموظف الرسمة على المكتب و يمسك الجريدة و يتصفح .
ياخذ الشاب الرسمه و قد رسمت على جبينه علامات الاستغراب و قال في داخله "حتى الحلم بتدخله فيه " لم يشا الشاب ان يتاخر في معاملته وقرر الذهاب الى اقرب مهندس احلام ليحصل على ختمه على ما تبقى من رسم حلمه .
دخل الشاب على مكتب المهندس و رأى رجلا واضعا قدميه على المكتب ونظارته قد انزلها الى طرف انفه حاملا بيده رسماً لحلم و بيده الاخرى قلم و قد ملأ الرسم علامات حذف من قلمه .
-"السلام عليكم".
نظر المهندس الى الشاب من اعلى النظارة و قال له "اهلين" و عاد مرة اخرى الى الرسم الذي بين يديه.
-"كيفك مهندس .. والله جاي اختم هالحلم من عندك عشان ابلش في اجراءات التسجيل "
-"ومين اللي رسملك اياها " و لم يكلف نفسه ان ينظر الى الشاب عندما قالها .
-"انا يا سيدي !!!!!!".
-"و مين ساعدك"
-"ما حدا ... يعني هاظ حلمي و انا اللي لازم ارسمه ليش حدا يساعدني !!!".
ينظر المهندس الى الشاب نظرة تهكمية و يقول "شكلك اول مرة بترسم حلم ؟؟".
-"اه والله" و يحدث نفسه "وبعدين معكو يعني لازم ارسم حلمي 300 مرة , هو حلم واحد".
-"هات تا اشوف شو عندك .. الله يستر" يرمي المهندس ما بيديه و ينزل قدميه و ياخذ الرسم من الشاب ... ينتظر ثواني ثم يفاجئ الشاب بضحكه هيستيرية "ولك شو هاظ الله يقطع شيطانك ... "
-"خير مهندس و ين في غلط "
-"قول وين في صح ..هات الكرسي اللي هناك و تعال جنبي خليني اورجيك هبلك,
اول شي مساحة الراتب هاي لازم تصغرها ..... يعني لازم تصير هااااالقد".
تظهر علامات تعجب على وجه الشاب " بس هيك صارت نص اللي راسمه "
-"وانت الصادق اقل من النص ... وبعدين بيت الراحة مسويلي اياه غربي .. من كل عقلك , حبيبي بتنقلة شرقي و بالايجار "
-"بس انا ما بحب الشرقي "
-"مش مهم تحب او ما تحب المهم انك تعيش "
ينظر المهندس الى الرسم نظرة تفقدية سريعة ثم يركز على الجزء الايمن من الرسم تظهر على وجهه علامات استغراب تهكمية " مرسيدس !!!!!! و الله انك انسان حلّيم "
-" حلّيم !!!!" و علامات تعجب على وجه الشاب .
-"يعني بتشطح باحلامك ... المهم صغرلنا هالمرسيدس و شوفلك اشي اصغر شوي , يعني سيفيا ممكن "
تظهر علامات قرف على وجه الشاب " لا شو سيفيا , فكني منك .. لو شو ما بشتري سيفيا"
-"يا سيدي انت حر بس بلاش مرسيدس" يسكت قليلا " ااااه هاي المساحة لازم تكبرها شوي ".
-"معقول في اشي بدي اكبره في هالرسمه .... الله يبشرك بالخير شو وين بدي اكبر " و علامات لهفه على وجه الشاب .
-"هاي منطقة عمر الزواج بلاش 25 خليها 30 او 35 ".
الشاب يشعر بالتذمر و الانكسار ولاينطق بكلمه و احدة .
-"على العموم يا ابني خذ عيد رسم حلمك و لا تنسى اللي حكيتلك اياه رح يساعدوك كثير ".
-"بس هيك حلمي صار كثير صغير و مش زي ما بدي "
ينظر المهندس الى الشاب نظره جدية و بها الكثير من الحكمة " اسمع يا ابني انت راسم حلمك على ارض الواقع و غير هيك صعب تقدر تبني ... بس اذا بتحب في ارض مش بعيدة من هون بتقدر ترسم زي ما بدك و تكبر و تصغر و حتى ما في داعي تمر على مهندس الاحلام او حتى على دائرة الاحلام المسقعات "
يقاطعه الشاب بلهفة و شغف "ايدي بزنارك وين هاي ".
-"هاي ارض الخيال ... بس في مشكلة صغيرة هناك بتقدر ترسم زي ما بدك بس ما بتقدر تبني .. البناء ممنوع هناك".
يعود الشاب الى نظرته المتشائمة و يخرج مكسور الخاطر .
يدخل الشاب الى منزله يرمي بجاكيته و يرتمي بدوره على السرير و ينظر الى سقف الغرفة و قد بانت على تعابيره علامات الياس , و لكنه فجأه قرر ان لا يستسلم و قال بصوت خافت " انا ليش ارد على هاظ المهندس .. لا يا عمي بكره بروح عا مهندس ثاني بلكي اعطاني هالختم و خلصنا " يسكت قليلا ثم يهز راسة مصراً "لا بدي اروح .. خلص بكره بطلع عا المهندس ".
يدخل الشاب على مهندس و قد بدا على مكتبه الترتيب و على مظهره حسن الهندام تبسم الشاب من المنظر . دخل و كله امل بان تنتهي معاملته و يحصل على الختم .
-"صباح الخبر".
-"اهلين صباح النور" و يقوم المهندس من مكتبه ليرحب بالشاب "اتفضل اهلا و سهلا .. كيف بقدر اساعدك "
-"جاي اختم رسمة هالحلم عشان اسجلها و ابلش ابني ".
-"مين رسملك اياها".
تظهر علامات تعجب شديدة على وجه الشاب ويرد باستغراب "انا !!!!!"و قد تذكر المهندس القديم .
-"طيب مين ساعدك"
-"ما حدا ..!!!!؟؟؟".
-"طيب شو قهوتك لانه بدنا قعدة ندرس الرسم"
و كانت هذه الكلمات الوحيدة التي اختلفت عن لقاء الشاب بالمهندس السابق .
الشاب طو ل اللقاء كان غائبا يفكر و يستغرب من مدى اتفاق المهندسين حول كل الامور و افاق الشاب من غيبوبته على قول المهندس "روح عيد رسم حلمك و زي ما حكيتلك".
يخرج الشاب من مكتب المهندس بلا اي ردة فعل و كانه جماد من جمادات مكتب المهندس.
يعود الشاب الى منزلة منهكا و محبطا بدا على و جهه علامات الاستسلام للامر الواقع خاصة بعد كلمات المهندس الثاني الذي لم يختلف حديثه عن زميله السابق , جلس الشاب على مكتبه و قد اعدّ كاسا من الشاي , وضع امامه الرسم و مسك القلم بيده اخذ رشفة من الشاي ووضع يده على راسه و اخذ يتمعن بالرسم
"طيب ماشي .. الراتب خلينا نصغرة شوي " و يؤشر بالقلم باتجاه مساحة الراتب "هيك ماشي حالة" و يا خذ رشفة اخرى من الشاي .
"طيب خلينا نشوف بيت الراحة " تظهر علامات تالم على وجه الشاب "صعب اخلي شرقي .... ولّا ماله الشرقي المهم اشي احاول ارتاح فيه و بعدين اللي بيت الراحة عندهم شرقي هيهم عايشين انا مش احسن منهم "ياخذ تنهيده ثم يتبعها قائلا "شرقي ..شرقي" يعود الى وضع التفكير مجددا متاملا في الرسم .
"طيب لو جبت سيفيا هسا امشي حالي وبعد 4-5 سنين ببيعها وبجيب احسن منها ...وبعدين السيفيا اقتصادية و قطع غيارها ملية البلد "يسكت قليلا "وبعدين انا رح اجيب سيفيا 2 مش 1 يعني احسن ... يا سيدي و هاي سيفيا " و يتبعها 2 . يسند ظهره على الكرسي و يضع يديه على راسه ياخذ تنهيده و ينظر الى اعلى الغرفة .
يعود الى رسمته "ظل عمر الزواج ...اللي لازم اكبره " يقولها بتهكم "اصلا انا عال25 ما رح اكون قد المسؤولية واني افتح بيت ورح اكون صغير وبعدين شو بدي بوجع هالراس ... في حدا بجيب الدب لكرمه " قالها وهو غير موقن بها ينطق بها لسانه وقلبه يستنكر هذه الجمل ثم يقول " 30 بكون هديت و بكون لازم اعقل و استقر .. وهاي 30 ..كبرناها لعيونكو " يرمي القلم على الرسم ويذهب الى سريره يرتمي على السرير يطفئ النور و ينام .
في اليوم التالي يذهب الى دائرة الاحلام المسقعات ليسجل الحلم او الحلم المعدّل .
-"صباح الخير ".
-"صباح النور"
-"بدي اسجل هالحلم "
ياخذ الموظف الرسم ويختمه بدون ان ينطق بكلمة واحدة
-"تفضل"
يستغرب الشاب بشدة وكانه راى شي عجيب لم يتوقع حدوثه
-"بشوفك ما سالتني ولا اشي ..المرة اللي فاتت اعملتلي عرس على الرسمة هسا ختمتها بدون ما تسال ولا سؤال ولا تعلق تعليق ؟؟!! حتى الرسم ما اتطلعت علي"
-"مبين عليك انك عايد رسم حلمك و متعلم الدرس فما داعي لاي سؤال "
عيش الواقع و لا تشطح باحلامك الا اذا حاب تحلم و ماتحقق يعني في بلاد الخيال .