كن من متابعين نهر الحب عبر تويتر

اضغط اعجبني ليصلك جديدنا بالفيسبوك
قديم 09-27-2010, 03:13 PM   #1

عضو مميز

 
الصورة الرمزية TE TO
 
تاريخ التسجيل: Mar 2010
المشاركات: 3,320
TE TO is on a distinguished road
افتراضي حقي

كان خالد جالساً مع صديقه ناصر في منزل صديقهم ابوسلمى
وفي اثناء ذلك سمعوا بالاخبار عن اعلان بنك امريكي افلاسه بسبب الازمه العالميه
وابوسلمى هو كبير المجلس وخالد يأخذ برأيه دائما لكبر سنه .
بعد سماع خبر افلاس البنك ..بدأ الحوار
خالد: ياخي ايش قصة الازمه هذي لسه ماخلصنا منها؟!
ابوسلمى : وين تخلص انت توك بالحمد. والازمه هذي بتمر علي العالم كله بما فيهم حنا تستفرد عضلاتها على الفاضي زيها زي انفلونزا الطيور والخنازير واوباما .
خالد: هههههه تنكت انت؟؟
ابوسلمى : لا ياخوي اتكلم من جد .
خالد: انت صاحي والا ايش ؟؟ كيف تمر علينا حنا مالنا دخل فيهم .
ابوسلمى : كيف مالك دخل فيهم وانت تتبعهم؟؟
خالد: كيف اتبعهم ياعمي وش تقول انت؟؟
ابوسلمى : لما تعلن الشركات والبنوك الامريكيه افلاسها…الدولار بيتأثر ولما الدولار يتأثر ريالك بيتأثر وبتخسر الدوله والشركات والبنوك هنا مثل ماخسرت هذيك البنوك الاجنبيه .
خالد : كيف احنا مرتبطين بالدولار..ياعمي تكلم زي الناس والا اسكت.
ابوسلمى : اقولك خذها مني بتسمع قريب عن البنوك السعوديه اخبار ماهي كويسه
ولو عندك حساب بالبنك ممكن بكره تصبح الصبح ماتلاقي فيه ولاهلله
ولما تسال البنك بيقولك معليش احنا وانتا خسرنا بسبب الازمه العالميه
والموت مع الجماعه رحمه واقلب وجهك .
فيقوم خالد مسرعا من المجلس وهم ينادونه ولكنه لايعبرهم ويبدأ ابو سلمى بالضحك عليه
فيقول ناصر لابوسلمى : ياخي جننت الرجال وانت ماعندك سالفه .
ابوسلمى : خله انا تعمدت اكبر الموضوع وابهره عشان يتأدب ويطلع الالوف اللي مدكنها بالبنك …ماعمره باشر علينا ولا بريال .
يدخل خالد بيته وهو في قمة عصبيته فيشاهد زوجته (ساميه) تشاهد مسلسل تركي :
خالد: كم مره قلت لك مهند هذا ماابغى اشوف وجهه قفلي التلفزيون والا كسرته على راسك
ساميه : وش بلاك انت انهبلت مهند خلص من زمان هذا مسلسل ميرنا وخليل… خليني اتابع المسلسل وعشاك بيجيك .
خالد: عشى مين ياشيخه انا في ايش وانتي في ايش سكري التلفزيون احسن لك.
ساميه : والله مااسكره الا اذا خلص المسلسل واعلى مافخيلك اركبه .
فيقوم خالد من مكانه ويمسك المزهريه لكسر التلفزيون الا انه يقف امامه ويقول :
يعني خسارة فلوس واثاث. ….بحريقه انتي والسحليه حقك خليه ينفعك .
في صباح اليوم الثاني يأخذ خالد شنطه ثم يهم مسرعا للذهاب للبنك وعند خروجه الى الصاله يجد زوجته كما هي لم تتحرك منذ البارحه :
خالد: بيجيك شلل……..من امس وانتي جالسه قدام التلفزيون,وخلي وجه الكنافه يجي يشيلك ويعالجك على حسابه .
ساميه : مهند احسن منك يجيب هدايا لزوجته ويدلعها مهوب زيك جلده .
خالد بهمس : الله يخرب بيتك ياناصر يوم نصحتني بالزواج……واللي قاهرني انك الى الحين ماتزوجت .
ويمر خالد على اكثر من بنك فيجدهم محشورين بالزبائن .
فيضطر للدخول وكان رقمه بعيد جدا ثم يتحدث مع نفسه :
كل ذولي خايفين علي فلوسهم وانا افكر اني سبقت العالم ..هذا وجهي لو لحقت على الفلوس في الزحمه هذي

لكن والله لو وصل دوري وقالي لي الموظف فلسنا بكسر البنك على روسهم …..والا ليش اكسره؟؟؟…. انا اخذ الاثاث وابيعه بالحراج عشان اتعوض .
يجلس خالد منتظراً دوره ويسمع شاب بجواره يتحدث لصديقه :
الشاب لصديقه: يقولون انه حيضرب فوق .
خالد يتدخل:ايوه ايوه حيضرب وحيضربنا معاه.
الشاب لخالد : انت خبير اسهم ؟
خالد : لا انا خبير ازمه.
الشاب : ازمة ايش.
خالد : انت ماسمعت بالازمه الماليه اللي حصلت بالعالم؟؟
الشاب: الا سمعت.
خالد : واكيد جاي تسحب فلوسك من هنا.
الشاب: لا طبعا جاي اكتتب في اسهم شركة الوطن .
خالد : ياعمي البنوك بتفلس بسبب الازمه وانتا تقول وطن وشعب اغلبه ساكن بالايجار وقروض وديون وحاله رديه.
الشاب : اسكت ياعمي بتودينا بداهيه انا ماقلت هالكلام .
خالد : انا اقرا بين الحروف وانت تبى تسب الحكومه بطريقه غير مباشره وكلامك وصل للمرور وهم جايين ياخذونك بتهمة كلام غير نظامي .
الشاب لصاحبه: هذا مجنون والا ايش؟؟
خالد : والله انتو المجانين وبكره تقولون خالد قال .
ثم يذهب خالد الى كرسي آخر ويقول الله يخرب بيت الامريكان خرابين بيوت حتى وهم بعيد …. فينتبه لوافد اجنبي بجانبه ينظر اليه مبتسماً …… فيحادثه :
خالد : انت امريكي؟
الوافد : انا بنقلاديش .
خالد : طيب تعرف جمع بطاطس؟؟.
الوافد : مافي مألوم .
خالد : جمعها بطاطيس ياخي شغل مخك.
الوافد : يبتسم ويهز راسه .
خالد : والله ماحد لاقيها الا انتو يالبنقال شغالين نهب وسرقات ونصب وهات يادب في الفلوس
وبعدين تروح تبني لك قريه في ديرتك وحنا ناكل تبن هنا .
على قولة المثل الفوكسي
قالو للبنقالي اسرق قال مايبغى حرام
الوافد : (لم يفهم كلام خالد فعلق مبتسماً وهو يهز راسه): سعودي واجد كويس .
خالد : ايه كويس طبعا خيرنا لغيرنا مع الاسف
صدق الشاعر فوكس يوم قال :
كل مالقيت باب جيت افتحه لقيت الباب مصكوك
مدري رداة الحظ والا الباب خربان .
الوافد : اووووه انتا رقم واجد بعيد ممكن دوام بنك فينيش انتا دور مايجي ….جيب عشره ريال انا يعطي رقم قريب .
خالد : يخخخخرب بيتكم حتى ارقام الانتظار ماسلمت منكم… ومسوي فيها ماتعرف عربي…هات الرقم طيب .
الوافد : جيب فلوس اول
خالد يخفض صوته : انا شيل فلوس من شباك يعطي انتا على طول مافي خوف سعودي واجد كويس.
الوافد : اوكي بابا بس بعدين لازم جيب فلوس .. انا مشكل كفيل .
خالد يمسك بيد الوافد بقوه وياخذ الرقم وهو يقول : يارجال هات لا افقع وجهك انت وكفيلك..هذا اذا كان كفيلك يدري عنك اصلا .
يأخذ خالد الرقم ويسحب على الوافد وبعد فتره من الانتظار يصل دوره واثناء وقوفه في الشباك
يبدا الحوار.
خالد للموظف : هات كل الفلوس اللي بحسابي لاتخلي ولاهلله .
الموظف : تبيها كلها كلها .
خالد : ايه كلها ياعمي ماتفهم عربي .
الموظف : تبيها ريالات عشان تعبي الشنطه والا خمسميات.
خالد : خلها ريالات عشان ماتلفت النظر ,انت عارف الريال عند بعض الهمج مايسوى….. رغم انه راس المال
الموظف ضاحكاً : والله انك صادق
يعطيه رزم الريالات ويضعها خالد في الشنطه وينظر الى يمينه فيشاهد رجل في الشباك الاخر ينظر اليه
خالد للرجل : خليك في حالك لو سمحت .
يجلس خالد بالبنك ويتصل بصديقه ناصر ويطلب منه الحضور للبنك لتخوفه من الخروج بالمبلغ وتعرضه للسرقه بالاكراه .
عندما وصل ناصر
ناصر : يلا اطلع انا بمواقف البنك .
خالد : جاي تاخذني من المدرسه انت ووجهك….تعال قدام باب البنك عشان اركب على طول لايشوفني احد شايل الشنطه.
يركب خالد السياره :
ناصر : ارتحت الحين يوم سحبت فلوسك؟
خالد : وين ارتاح وهي بيدي ابغى اخبيها بمحل آمن .
ناصر : مافي احسن من بيتك.
خالد : صاحي انت .تبيني اوديها للمجنونه ساميه والله تشم ريحة الفلوس من بعد خمسين كيلو…. تصدق شكلي بدفنها بالبحر .
ناصر : ياكلها السمك.
خالد : لاياشيخ .
ناصر : اتكلم جد انت ماسمعت بهوامير الاسهم ؟
خالد : الا سمعت بس وش دخلهم بالبحر .
ناصر : الهامور وين يعيش؟؟؟
خالد : في البحر طبعا .
ناصر : هوامير الاسهم قدرو يسرقون فلوس الناس المساكين وهي جالسه في بيتها
مايقدرون على فلوسك وهي في البحر المفتوح على مصراعيه ؟؟!
خالد : لالالا مو لهذي الدرجه ياعمي يعني مو معقوله يخلون ملايين المغفلين بالاسهم ويجون لي عشان ثلاث الاف ريال .
ناصر (باستغراب شديد ): كممممممممممم ؟كمممم ؟؟
خالد : يووه فضحت نفسي…… قول ماشاء الله تكفى .
ناصر : الله يخرب بيت عدوك وجايبني من بيتي ووقف قدام باب البنك عشان ماانسرق ومدري وين اودي فلوسي وبالاخير طلعت ثلاث الاف .
خالد : هالمبلغ اللي موب عاجبك راتب معلمه سعوديه في مدرسه اهليه لاربع شهور.ركز معي اربععععع شهور ماهي بهينه .
ناصر : وين راحت فلوسك اللي جمعتها ووين تودي فلوسك اللي ماتصرف منها ولا هلله يابخيل
خالد : ياخي انت ماتدري……. انا انطردت من وظيفتي قبل سنه وكنت اعيش على الفلوس اللي جمعتها قبل ومابقى عندي الا هذي وماسك نفسي واعيش بالقطاره حتى تموين البيت صرت اسرقه من بيت ابوي وهو مايدري
ناصر : كيف انطردت وشلون تطلع كل يوم تروح الدوام
خالد : الحقير مديري بالعمل رفض يجدد عقدي قال ايش قال الوظيفه ماتناسبك واكتشفت بعدين انه جايب ولد اخته وعينه مكاني براتب اعلى من راتبي بثلاث الاف ريال ورحت قلبت عاليها واطيها عليه وكل مااقدم في شركه يطلبون مني اسم الشركه اللي اشتغلت فيها عشان الخبره واذا اتصلو على المدير يسالونه عني يقولهم انتبهو توظفونه هذا مجرم هجم علي بالمكتب وحرق حواجبي بالولاعه .
وعلى قولة عادل امام ناس عندهم لحمه بيعزمو ناس عندهم لحمه عشان ياكلو لحمه؟؟!!!!) .
المهم رحت وقدمت على الخدمه المدنيه وقالو راجعنا كل عشر سنوات وهذاني انتظر كملت سنه وباقي تسع سنوات.
ناصر : ياخي خش جامعه بفلوس كمل دراستك واذا تخرجت بتلاقي وظيفه زي الناس .
خالد : اقول لايكثر بس مهندسين ودكاتره جالسين ببيوتهم ماحد وظفهم تبيني انا الاقي
المهم ماعلينا روح بيت الوالد لقيت طريقه اخبي فيها الفلوس
يصل خالد منزل والده ويجده في الحديقه يحتسي القهوه , وبعد السلام وقبلة الرأس
خالد : ابوي انا صار لي كيت وكيت وكيت….
ابوه: وش كيته انت يالخبل وش تقول؟
خالد : لا بس ابي اشوفك مركز معي والا لا…المهم باختصار انا انطردت من عملي
ابوه: ادري .
خالد : بلل وش دراك؟!!!
ابوه: اشوفك كل يوم جالس على البحر بوقت الدوام
خالد : حرام عليك يابوخالد وساكت ماتقولي عشان اغير المكان!!! طيب ليه ماقلت لي؟؟؟
ابوه: ماتدخلت عشان ابيك تعتمد على نفسك انت منت صغير ولو تحب السما ماساعدتك بريال الا اذا شفتك تشحذ .
خالد : انا مابيك تساعدني انا ابيك ترضى عني وابي اعطيك هالمبلغ لك انت وامي عشان الله يوفقني والقى وظيفه .
ابوه : راضي عنك بدون فلوس .
خالد : تكفى خذها اشتر لامي كنب امس عيد ميلادها وبعتبر المبلغ دين عليك واذا قربت اشحذ تدبر نفسك وتعطيني اياه .
ابوه: خلاص لكن مو تجي كل يوم تقول عطني خمسه وعشره ريال ماني بفاضي لك
خالد :لا مارح اخذ منها الا للضروره .
وبعد مرور تسع سنوات عاش فيها خالد على المره والمره والمره والمره والمره والسلفيات من اصحابه وباع كل اثاث منزله ماعدا الكرسي الذي تجلس عليه ساميه والتلفزيون والدش والثلاث الاف اللي تركها لدى والده انتهت ….
راجع الخدمه المدنيه وقابل المدير :
المدير: ابشرك لقينا لك وظيفه بتدخلك التاريخ من اوسع ابوابه…لو وافقت عليها بتكون اول عامل نظافه سعودي وبتحصل على اعلى راتب لعامل نظافه بالعالم وهو مبلغ 1200 ريال وبنصرف لك بدل ريحه 10 ريال وبدل ذباب 15 ريال وبدل شمس 10 ريال وبدل احراج 50 ريال وهذا البدل يصرف لك اول ثلاثة اشهر الين يتعود المواطنين عليك وتكتب عنك الجرايد وتصورك المحطات الفضائيه والعالميه.. بعدها بنوقفها عنك .
خالد بحسره : زبال يعني؟؟!!
المدير: لألأ…. عامل نظافه….. زبال هذي تقولها في بيتكم .
خالد : موافق بس بشرط !!
المدير: طرار ومتشرط بعد….تفضل قول…
خالد : تعطيني عشره ريال ارجع فيها البيت وبكره بكون عندك باذن الله .
المدير: بعطيك عشره وبخصمها من اول راتب !! .
بعد ان خرج خالد من مكتب المدير في الخدمه المدنيه استقل اول تاكسي قابله وطلب منه التوجه الى مسجد قريب من منزله ودار حوار بينه وبين سائق التاكسي .
سائق التاكسي: مبين عليهم شايتينك .
خالد : العن من الشوته والله …كانو بيشغلوني زبال.
سائق التاكسي: اف اف شدعوه سعودي زبال ..قويه .
خالد : لا وبيعطوني بدل ريحه وبدل ذبان الله يخرب بيتهم .
سائق التاكسي: ( يضحك بقوه) : ياخي وش صاير بالبلد؟؟؟!!!..طيب بدل ماتدور على وظيفه ليه ماتقدم على تصريح تكسي مثلي يعطونك سياره وتسددها على اقساط والله فيها خير .
خالد : ادري عنها لكن من وين ادفع لهم قسط السياره؟؟ ماعندي أي دخل.
سائق التاكسي: انت بتاخذ الليموزين تعلقه على الجدار؟؟؟؟..ياخي دخلك من المشاوير يجيب لك القسط وزياده
خالد : اما يجيب لي قيمة القسط وزياده كثر منها..ليه انت كم دخلك؟
سائق التاكسي: انا ادخل قيمة القسط وفوقها اللي يكفيني اكل وشرب اضافه الى ان راتبك بيدك متى مااحتجت فلوس روح وصل الناس . بس شيل من راسك جوال وتلفون وتلفزيون وكل الكماليات لازم تحرم نفسك منها عشان تعيش .
خالد : يارجال انا محروم منها بتكسي وبدونه… المشكله لو طلعت التكسي اخاف الناس ماتركب معي لانهم مايحبون الا الهنود ومع احترامي لك لوما الحر ماركبت معاك .
سائق التاكسي: انت رزقك اغلبه من الحريم بتوفيق الله والحريم صارو يخافون من الاجانب بسبب الجرايم اللي سووها ومايركبون الا مع سعودي .
خالد : تصدق احس جتني طاقة وحماس ومن بكره بقدم على التصريح ..بس كم ياخذ ويعطوني؟
سائق التاكسي: اذا اوراقك جاهزه يطلع خلال شهر بالكثير اهم شي ماتكون عندك وظيفه .
خالد : الله كثير شهر ….. الله يصبرني بس … ماتعرفنا عليك اخوي ؟
سائق التاكسي: انا اسمي سامر مصطفى
خالد : معليش بالسؤال …لكن انت سعودي؟
سائق التاكسي: انا امي سعوديه وابوي اجنبي.
خالد: انا اقول السحنه ماهي سعوديه والاسم كمل عليها..طيب شلون عطوك الليموزين وانت منت سعودي ؟
سائق التاكسي: طلعته باسم اخوي لانه سعودي .
خالد : وش هالحوسه..طيب ليه اخوك اخذ الجنسيه وانت لا ؟
سائق التاكسي: تاخرت عن المده المسموح فيها بالتقدم ورفضو يستثنوني وهذاني احاول فيهم ؟
خالد : اجل اخوك اكيد ماعنده وظيفه والا كان ماعطوه .
سائق التاكسي: لا اخوي موظف بشركه ومهنته بالاحوال متسبب عشان كذا عطوه تصريح .
خالد : ياعيني على الحوسه …يالله فمان الله يابوسمره .
ينزل خالد من الليموزين وهو سعيد لانه لن يشحذ ويحمدالله لانه سخر له هذا الشاب الذي اعطاه امل بالحياه …..ثم يدخل بيته ويجد زوجته ساميه تنتظره اما الباب :
ساميه : هلا خالد حبيبي نورت البيت .
خالد : هلا بوجه النحس.
ساميه : مقبوله منك……… ترى الغدا جاهز .
خالد : تونه طبعا .
ساميه : هذا الموجود حبيبي .
خالد : تصدقين قبل مااطلقك كنت احس اني كلب من معاملتك لي. والحين احس اني قطو تدلعيني وتأكليني تونه كل يوم .
ساميه : كنت غلطانه ياخالد خلاص انسى الى متى وانت شايل علي .
خالد : الين ارتاح منك ومن شوفة وجهك وابشرك ترى البقال رفض يعطيني على النوته يعني لاتونة بعد اليوم.
ساميه : حرام عليك ياخالد والله اني عجزت ابي ارضيك ماعرفت.. ليش تعاملني كذا صرت ماأشوف تلفزيون وصايره مثل الخادمه عندك حرام عليك خلاص انسى الماضي كنت في فترة مراهقه وانتهت .
خالد : قال ايش قال مراهقه …..اصلا ماعقلتي الا يوم طلقتك ورميتك بالشارع…. واللي مصبرني عليك انك مقطوعه ماعندك اهل والا كان انتي عندهم من زمان.
ساميه (تبكي) : خالد ح ح ح……
خالد مقاطعا: بلا حا بلا ماني بقادر انسى تعاملك وتفضيلك الوصخ مهند علي …كنت احتاجك باخس الظروف وماالقى الا شين النفس منك.ومهما سويتي ماظنيت اني بنسى ماضيك .
يتجه خالد الى غرفته ويقفل الباب وبعد ساعتين تأتي له ساميه وتطرق الباب :
ساميه : خالد ترى مافي مويا بالبيت وانا بموت من العطش .
خالد : ماعندي فلوس .اشربي من الحنفيه….. والاتبيني اسرق؟
ساميه: طيب ليه ماتبيع التلفزيون والكرسي دامنا مانشوف تلفزيون من سنين .
خالد : انا مخليهم قدامك عشان كل ماتشوفينهم ضميرك يأنبك على السنين اللي ضيعتيها عليهم .
ساميه : الله يسامحك ياخالد والله يحنن قلبك علي .
بعد شهر يحصل خالد على الليموزين ويبدا في وظيفته الجديده ..وتمر عليه شهرين عاش فيها افضل حالاته النفسيه وكان يأتيه مايكفيه طيلة الشهر لتوفير اكله وشربه دون ان يحتاج لاحد …وذات يوم كان عائدا الى بيته فانتبه لشاب يطلب منه الوقوف والساعه كانت تشير الى الثانيه عشر ليلاً فتوقف له ظناً منه بأن الشاب لن يجد تاكسي بسهوله في ذلك الوقت . ركب الشاب وكان على عجله من امره .
خالد : شكلك من زمان موقف.
الشاب: لا توني واقف.اطلع على العرضيه بسرعه.
خالد : وش عرضيته بهالوقت .
الشاب: ياخوي وش عليك انت اطلع بسرعه لايفوتني الاكشن .
خالد : ياخوي تروح البر في الليل ومنطقه مقطوعه !!! لايكون ناوي تخطفني ؟!
الشاب: من زينك عشان اخطفك …اقول بتروح وانت رجالن تضحك وماني بنازل من السياره الا بالعرضيه .
خالد : المشكله انك عصل يعني لو انفخ بوجهك طرت….. انزل بس لااشوتك من السياره .
الشاب: بتروح غصبن عنك.
خالد : وش هالبزر اللي مسوي فيها قوي ..اقول انزل دام النفس عليك طيبه .
الشاب يتمسكن : تكفى يرحم والديك ودني اخوي مخطوف من يومين ودق علي من جوال قبل شوي وعلمني انه هناك وحالته صعبه .
خالد : انت صادق؟؟!!
الشاب: اقسم بالله اني صادق والشرطه راحت هناك وماعندي احد يوديني .
خالد : مع اني احس انك تخف فيني لكن بوديك وان طلعت نصاب ياويلك .
وعند وصوله للعرضيه وجد تجمع كبير من السيارات والاشخاص:
خالد : وش انت… اخوك وزير والا وشو ..بعدين وين الدوريات؟
الشاب: انت مصدق انت ووجهك …هذا احلى مكان بالدنيا وفيه اكشن ماعمرك شفته .
خالد : وش قصدك ؟
الشاب : ياعمي هذا شارع تفحيط وفيه كبارية التفحيط ابو لزقه وابو قلص وابو سطحه وذولي مايجون الا بفلوس هنا من قوة شهرتهم .
خالد : الله يخرب بيت ابو شكلك جايبني محل تفحيط .
الشاب يهم بالنزول : يلا اقلب وجهك.. وابشرك فلوس مافيه .
يمسك خالد بالشاب من ثوبه ويهدده بالدفع والا ذهب به للشرطه ويبدا عراكهم واثناء ذلك وفي عتمة الليل تأتي سيارة المفحط ابو لزقه وتصطدم بتاكسي خالد في حادث شنيع يصاب خالد بسببه بجروح وكسور تقعده بالمستشفى لمدة شهرين ,وبعد خروجه يراجع المؤسسه لطلب تعويضه عن الحادث واعطائه تاكسي جديد, ولكن يرفض طلبه والسبب قيامه بالتفحيط والخطا كان عليه مئه بالمئه لانه انقلب بالسياره اثناء تخميسه بالسياره.فيجن جنون خالد ويحكي لهم القصه ولكن لا احد يصدقه ويحاول بشتى الطرق ان يقنعهم ولكن دون جدوى ,فيعود الى وضعه السابق ويقرر ان يعود الى الشحاذه ويقول :
مكتوب عليك الشحاذه ياخالد .
يذهب الى احد المساجد ليبداً مهنته الجديده وبعد ان يفرغ من الصلاه يدعو الله ان يرزقه بوظيفه تغنيه عن الشحاذه ثم يخرج فيكتشف بانه تأخر كثيرا بالخروج فالمصلين اغلبهم خرجو من المسجد ولكن يجلس وهو في قمة ارتباكه على الارض وفي قلبه غصه ودموعه محبوسه غير مصدق بأنه وصل لهذه المرحله وغير مقتنع بما سيقوم به .
واثناء جلوسه على الارض يأتي له امام المسجد الشيخ ابوزهره ويبدا الحوار :
ابوزهره: خير ياخوي وش بلاك جالس كذا على الارض عسى ماشر .
خالد : لم يستطع تمالك نفسه فيبكي بكاء من القلب : ياشيخ انا حالتي تعبانه وماابي اشحذ
ابوزهره: وش حادك يااخي وش قصتك …… انت مدمن ؟؟؟
ويحكي خالد للشيخ قصته كامله …..وبعد ذلك :
ابوزهره: انت في ديرة خير وبركه وتشحذ!!! وبعدين وش الفرق بين عامل النظافه والشحاذ
بالعكس انا اشوف ان عامل النظامه افضل من انك تذل نفسك وتطلب الناس .
خالد : ماارضاها على نفسي اشتغل زبال لو اموت وانا عندي الشحاذه اشرف وكل واحد وتفكيره.
ابوزهره: طيب قدم على الجمعيات الخيريه يصرفون لك راتب شهري اذاماعندك دخل .
خالد : قدمت عليهم قالو ابوك عايش يقدر يصرف عليك و قالو لي بعد جب تزيكه من امام المسجد انك تصلي الصلوات الخمس مع الجماعه.
ابوزهره: طيب التزكيه تقدر تجيبها لكن كيف ابوك عايش وتشحذ..ياخي امرك غريب .
خالد : انا اصلي في برتبل قدام بيتي ومافيه امام رسمي كل يوم يصلي واحد فينا مره باكستاني ومره هندي ومره شايب موب حافظ الا المعوذات ويغلط فيها بعد, حتى معاذ ولد جارنا اللي عمره 12 سنه يصلي فينا ..من وين اجيب تزكيه بالله عليك ؟
ابوزهره : ياخي امر التزكيه سهل لكن المشكله في ابوك …ليش مايساعدك .
خالد : ابوي تعب وهو يساعدني والحين هو بالمستشفى صار له فتره طويله في غيبوبه بعد مااعطى كل حلاله لتاجر اسمه ( لمه اللمه) اخذ فلوس الناس عشان يستثمرها وسحب عليهم والى يومك ماعطاهم شي .
ابوزهره : طيب ابوك ماعنده دخل ثاني .
خالد : اقولك خسر كل فلوسه ومريض ولايحس بلي حوله .
ابوزهره: قلت للجمعيه ان ابوك مريض ومعسر؟
خالد : قلت لهم لكن مافي فايده قالو انت ماتستحق الزكاه ولو بنعطي كل عاطل راتب مابقى فلوس بالجمعيه والتجار يتبرعون بالقطاره .
ابوزهره : طيب احضر لي صوره من دفتر العايله وصوره من تقرير لابوك انه مريض وجب لي ورقه عليها شاهدين انك ماتشتغل ولاعندك دخل وانا بدلك على طريقه تساعدك .
يتجه خالد مسرعا الى البيت ويجهز ماطلبه ابوزهره ثم يعود لابوزهره ويعطيه اياها .
ابوزهره: لاتعطيني اياها خذ هذا الخطاب وروح للشيخ (مليان خلقه) وهذا تاجر كبير وبيساعدك بمبلغ تبدا فيه مشروع صغير وياااخوي خالد تقرب من ربك اكثر واكثر ترى ماحد بينفعك الا دينك وصلاتك .
خالد : الحمدلله على كل حال مايحتاج توصي .
يتجه خالد الى منزل الشيخ( مليان خلقه) ويعطي الحارس اوراقه ويطلب منه ايصالها للشيخ
الحارس : جاي تشحذ اكيد .
خالد : لا جاي اصور معاك انت ووجهك .
الحارس : ياخي غريبه على بلد فيها نفط والعالم كله يجري وراه واولادها يشحذون .
خالد : ياخي غريبه على واحد مثلك حارس جحلط وجالس يتفلسف .
الحارس : انا الحمدلله اخذ راتب مو زيك اشحذ من الناس .
خالد : اقسم بالله ان ماسكت ورحت لشيخك تودي له الورقه لا اسويك مع الارض .
الحارس : شكلك ماتعرف الشيخ…. لكن من الحين اقولك مارح يعطيك شي .
يتجه الحارس لداخل القصر وبعد فتره يعود الى خالد ويطلب منه الدخول
يدخل القصر وينبهر مما شاهده وتعود له الغصه التي جائته امام المسجد ويكاد يبكي من شدة قهره ولكنه يتمالك نفسه واثناء انتظاره بصالة الجلوس يسمع الشيخ مليان خلقه وهو يتكلم بالهاتف
الشيخ يتحدث بالهاتف : طال عمرك اتشرف بحضورك لزواج بنتي على ابن الشيخ متروس بن منفوخ .
خالد بهمس : بل وش ذا الاسم شكل ولده كبر بير النفط .
الشيخ : ايه طال عمرك نانسي وهيفاء ومطربه جديده اسمها شايله بيحييون الحفل بصالة الرجال والساعه 12 برسلهم لصالة الحريم .
خالد بهمس : ياسلااااااااام نانسي وهيفا اللي يحبهم خويي ابو سلمى ..ليته يشغلني عنده شكله رايق بقوه .
الشيخ : والله انك صادق طال عمرك ملايين تطير بيوم واحد لكن هذي بنتي الوحيده ولازم اسوي لها عرس الكل يتكلم عنه .
ثم يغلق الشيخ الهاتف ويطلب من الحارس ادخال خالد
الشيخ : هلا حياك الله …..انت اللي جاي من طرف الشيخ ابوزهره ؟
خالد : اي نعم طال عمرك .
الشيخ : والله ياولدي انا استغرب انك سعودي وجاي تطلب مساعده !!
خالد باحراج: مرت علي ظروف الله اعلم بها طال عمرك .
الشيخ : طيب انت في بالك مشروع معين .
خالد : والله ودي ارجع التكسي اللي كنت اشتغل عليه واذا عليك تكليف وماودك تدفع شوف لي واسطه عشان يعوضوني .
الشيخ: اي تكسي ياخي اقولك مشروع تقولي تكسي .
خالد: سم طال عمرك اجل تبي مشروع ثاني؟ ..ابشر ..مممممممممم بصراحه انا ماودي اكلف عليك وبقاله صغيره تفي بالغرض, واوعدك ماابيع دخان فيها .
الشيخ : ياخي انت اهبل والا شكلك كذا؟
خالد : نبيع دخان ليش لا اهم شي رضاك طال عمرك ولو تبي استورد شروت للتواجير شرواك ابشر من عيوني .
الشيخ : ياأخي عندك مشروع زي الناس فيه ربح مجزي لي ولك والا مع السلامه .
خالد: والله انا جاي على انك بتعطيني فلوس وبفتح مشروع على قدي مادريت انك تبي تشاركني .
الشيخ : مخلفك وناسيك عشان اعطيك بدون مقابل .
خالد : اعتبرني نانسي عجرم وعطني..ومستعد اسوي لك سامري بعرس بنتك واخلي الشيخ متروس ينام عندك من زود الوناسه .
الشيخ يصرخ : تتسمع على مكالمتي ياقليل الادب.
وينادي مرزوق كبير الحراس .
مرزوق: سم ؟
الشيخ :شيل الشحاذ هذا وارمه برى ..قال ايش تساعدني ..فاتحها جمعيه خيريه؟
خالد يصرخ : حتى لو فاتح جمعيه نظاما مااستحق لان ابوي عايش !!!!
الشيخ : شيلووووه .
ويعود خالد مشيوت للشيخ ابوزهره ويخبره بما حصل :
ابوزهره : ياخي صدمتني من جد انا افكره رجل تقي اثره راعي نانسي وطختها .
خالد : افاااااااا….انت تعرف نانسي ياشيخ ؟
ابوزهره بإحراج : مو توك تقولي السالفه ياخي وش بلاك انت….استغفر الله العظيم .
خالد : طيب والحل ياشيخ .
ابوزهره : اذا الشيخ مليان خلقه ماعطاك اجل ماحد بيعطيك.
خالد : شكله راهي بقوه بو خلقه هذا .
ابوزهره : يقول صاحب لي ان عنده بحساب واحد بس نص مليار ريال .
خالد : العن امه كل هالمبلغ عنده ويبي يشاركني ببقاله .
ابوزهره : استغفر الله ياخي اللعن مايجوز انت وين تبي الله يرزقك وهذي الفاظك والحسد مالي عينك .
خالد : استغفر الله والله قلتها بدون شعور .
ابوزهره : خلاص وش تبي الحين مقدر اسوي لك شي .
خالد : افا وش هالجحده؟ يعني ارجع اشحذ .
ابوزهره : والله بكيفك انا حاولت اساعدك وماقدرت .
يعود خالد الى البيت ويجد ساميه بانتظاره كالعاده :
خالد : والله شكلك انتي اللي ناحستني الله يخرب بيتك ياشيخه ويفكني منك .
ساميه تبكي: انا تعبت خلاص تعبت .
خالد : عساك التعب ياشيخه .
في صباح اليوم التالي يذهب خالد لزيارة والده في المستشفى بعد ان اخبروه بانه بدأ يتكلم.
خالد : هلا بو خالد سلامات ماتشوف شر تكفى اصحى ياشيخ ترى الفلوس وصخ دنيا .
ابوخالد بحسره: فلوسي….فلوسي .
خالد : فلوسك خلاص بح شح مح خذها الطير وطار .
ابوخالد: فلوسي شقى عمري ياام خالد .
خالد : انا لله وانا اليه راجعون .
خالد للممرضه: الحين وش سالفة ابوي يادكتوره.
الممرضه : دكتور يجي الحين .
بعد دخول الطبيب
الدكتور : انا الدكتور عماد المسئول عن حالة والدك من اليوم ورايح .
خالد : وش فيه ابوي يادكتور؟
الدكتور عماد: ابوك مصدوم وحالته بتجلس كذا على طول مع الاسف.
خالد : ينظر الى ابوه ويتذكره عندما قال له مارح اساعدك الا اذا شفتك تشحذ ثم يدخل في نوبة بكاء ويقبل راس ابوه ويقول : ابوي تكفى اصحى ماعندي احد غيرك انا احس اني بغربه .
الدكتور عماد: لاتتعب نفسك اخوي والله يكون بعونك .
يخرج خالد من المستشفى و يتجه الى مسجد آخر ويجلس نفس الجلسه وهو يبكي .
واثناء ذلك يأتيه شاب يلبس بدله وكرفته وآخر انتكه :
توضيح لبعض الكلمات في الاسفل ( وئعت = وقعت) (لزئه = لزقه) (ئولت = قلت) (يدوك= يعطونك .
( قهاز = جهاز) (قاي = جاي) (سدئت= صدقت) (بهرج = امزح) (دلوئتي = الحين) .
الشاب: انتا وئعت واحنا كولنا حنسمي عليك .
خالد : بسم الله … وش تقول انت ؟؟
الشاب : معاك زكي من شركة ال زد جي اتش ( (lzgh للتسويق وده الكرت بتاعي .
خالد : وهو ينظر للكرت : ههههههههههههه اسم الشركه لزقه ؟
زكي : لزئه دي عندكو هنا وانما في الدول المتقدمه شعار لاكبر شركات التسويق .
خالد : شكلك تخف فيني لكن امرني وش بغيت .
زكي :احنا شركة تسويق وبنسوق لكول حاقه في الدنيا من دبة النمله لغاية التجاره في الكواكب…انت قاي تشحت صح ؟
خالد : يعني….. جالس اتباحث مع نفسي لسه .
زكي : طيب لو انتا عاوز تشحت الشركه ممكن تسوق لك مهنتك …ئولت ازاي ….احنا بنوفر ليك كل الوسائل اللي تخليك تشحت زي الاوادم . يعني مثلا نخلي موظفين عندنا يمشو قدام الناس اللي مليانه ويدوك 500 ريال فلما تشوفهم الناس المليانه حيدوك 500 زيهم أو اكثر عشان عيب ده يدي 500 وانا ادي اقل وبكدا نضمن لك دخل 2000 ريال باليوم باذن الله .
خالد : الله وش هالتطور ..طيب هل ال500 الي بيعطيني اياها موظفكم تصير لي والا تاخذونها وكيف بتعرفون الناس المليانه من الناس الفاضيه .
زكي : لا طبعا ترجعها للموظف بعد ماتمشي الناس …وبالنسبه للناس المليانه عندنا قهاز لما يمر اي واحد منه يبان اذا كان جيبه مليان والا فاضي .
خالد : ياشييييخ …طيب مرره علي خلني اشوف .
يمرر زكي الجهاز امام خالد : يااااااه دنتا مليااااان .
خالد : قل قسم بالله .
زكي : مليان هم ياعيني .
خالد : اعوذ بالله حتى الهم يطلعه بعد ؟؟؟!!!
زكي : انتا سدئت ..دنا بهرج هههههه..طبعا فاضي .
خالد : احسبك صادق الله يرجك..طيب انا ماودي اخدع الناس بصراحه لكن ابي اجرب الجهاز… كيف طريقة الاشتراك عندكم .
زكي : ولا حاقه: مجرد رسوم سنويه ناخذها منك وهي مبلغ ولا حاجه يعني بيسموه عندكو هنا (طفسه) .
خالد : كم يعني ؟
زكي : قبل مااقولك كام انت عملت دراسة جدوى للشحاته بتاعتك ؟
خالد : فاتح شركه استثماريه عشان اسوي دراسة جدوى؟!
زكي : بالعكس دي تفيدك أوي لان التخطيط المسبق يساعد في نجاح المشروع … طيب مش مهم احنا حناخذ منك ثلاث الاف ريال كل سنه وتقدر تدفعها على اقساط كل شهر 250 ريال ونضمن لك مافيش خساره باذن الله .
خالد : دام في ضمان اجل موافق توكل على الله .
زكي : حتدفع اد ايه دلوئتي؟
خالد : ولا ريال ..ماعندي شي الحين… توني فاتح !!! .
زكي : ماينفعش لازم تدفع .
خالد : خلاص اجل يفتح الله .
زكي : طيب ادفع 50 دلوئتي وبعدين تكمل الباقي عشان اقدر اسجل اسمك .
خالد : والله ماعندي ولا ريال .
زكي : طيب حستناك لغاية مايمشي كل المصلين يمكن يدوك حاجه مع اني متاكد مش حيدوك اي حاجه لان لبسك نظيف وشكلك نظيف .
خالد : معليش توني مااخذت خبره .
ويمر المصلين ولاياخذ خالد اي ريال فيأتي اليه زكي :
زكي : مالكش بالطيب نصيب انا اسف قدا ودام انتا بصحتك روح شوفلك شغله تانيه احسن .
خالد بنرفزه : وانت ليش ماتشوف لك وظيفه زي الناس بدل ماتعلم الناس الشحاذه
زكي : انا عندي بكالوريوس تسويق والشحاته مش صنعتي لكن اوامر الشركه ولازم انفذها والا حخسر الوظيفه وانا مابعملش حاقه غلط على فكره ومابعلمش الناس الشحاته وانما اسوق لأي مهنه وبس لكن انت اللي بتعمل غلط لما تشحت وبلدكو فيها خير كتير لكن عاوزه ناس تتعب عشان تجني .
يقتنع خالد بكلام زكي ويقرر نسيان الشحاذه والتفكير في طريقه للحصول على مبلغ مالي لفتح بقاله واثناء تفكيره يتذكر صديقه سعيد الذي لم يقابله منذ عدة سنوات ويقرر بأن يتصل عليه كون حالة والده الماديه كانت جيده وقد يستطيع مساعدته بمبلغ فيتصل على صديقه ناصر يساله عن سعيد فيخبره ناصر بان سعيد يعمل في شركة ارامكو ولايملك سوى رقم مكتبه فياخذه منه .
في صباح اليوم الثاني :
خالد : السلام عليكم
سعيد: عليكم السلام
خالد : سعيد معاي؟
سعيد: اي نعم اخوي من يتكلم؟
خالد : انا خالد الديري ياوجه الطبل .
سعيد: هلا اخوي خالد حياك الله .
خالد : وش هالاستقبال البارد
سعيد: اعذرني والله ضايق صدري على مايكل توفى امس .
خالد : افاااا .عظم الله اجركم …ياخي وش حادكم على السواقين وانتو بصحتكم.عسى السياره ماجاها شي بس ؟
سعيد: وش سواقينه ووش سيارته الله يصلحك انا اقصد مايكل جاكسون .
خالد : االلله ياقدمك الى الحين تسمع له؟! ..خبري به على ايام الددسون والبريك دانس والطاقيه ام جنيه ..ياخي استح على وجهك رجال وش كبرك وتسمع لمايكل وهالخرابيط .
سعيد: ياخي يقولون انه مات مقتول .
خالد : اقول سعيد ماودك تشاركني بمشروع..انت بالفلوس وانا بالمجهود .
سعيد: وش فيك دخلت عرض!! ….لا ماودي .
خالد : ليه تصكها بوجهي كذا طيب ؟!
سعيد: ياخي سالتني ودك وجاوبتك ماودي وخلاص …من عرفتك وانت مصلحجي ياخالد …عموما لو تبي تمويل تقدر تقدم على قرض وتفتح اللي تبي .
خالد : ياخي ماعندي وظيفه وحالتي الماديه صفر وعلي قرض لمؤسسة تمويل التكاسي .
سعيد: طيب قدم على ابومتعب تراه يسدد عن الضعوف اللي مثلك .
خالد : شكرا على وقفتك السلبيه ياسعيد فمان الله .
ينصدم خالد من رد فعل صديقه سعيد ثم يتجه الى مجلس صديقه ابوسلمى ويحكي له ولناصر كل ماحدث له ويطلب من ابوسلمى سلفه ولكن ابوسلمى يتعذر بانه ليس لديه مال ويكفي مااقرضه اياه على مدار هذه السنين .
واثناء ذلك يعرض التلفزيون الاخبار ويشاهد ملك الانسانيه ابومتعب وتنزل دموعه فيقول
ياخي احبك والله احبك ولو اوصلك والله منت مقصر لكن كيف اوصلك ؟
ناصر : سهله ياخي روح الديوان ادخل عليه والله لو درى بحالتك مايخليك كذا.
ابوسلمى : يارجال البلد مليانه من اللي مثل خالد ولو بيعطونهم كلهم فلست الديره خاصه ان في ناس ماعندها بيوت يعني وضع خالد احسن من وضعهم ساكن في بيت ابوه بعد ماماتت امه الله يرحمها .
خالد : الله يرحمها ماتت من الحسره على ابوي الله يشفيه .
ناصر : ياخي خله يروح وش بيخسر….. انا اعرف واحد قدم على ابومتعب وصكه بخمسين الف سدد القرض اللي عليه للبنك .
خالد : ياخي اللي يدخل عليه بيحصل خير بس كيف ادخل عليه؟
ناصر : طيب ارسله برقيه عن طريق الهاتف وتوصل للديوان ثاني يوم وبعدين تابعها بالتلفون .
خالد : اجل بكره بسويها .
ناصر : خذ خمسين ريال حق البرقيه معاك .
خالد : طيب يابوسلمى دامك مروق عطني سبعين ريال عشان اروح للهاتف بتكسي تعبت من النقل الجماعي حر وريحه ولك وعد مني لو عطاني ابومتعب فلوس وفتحت البقاله بعطيك على النوته .
ابوسلمى بنرفزه: آخر سبعين اعطيك اياها ياخي ابتلشت فيك والله .
يتجه خالد الى شركة الهاتف ويقدم خطابه ويطلب من الملك مساعدته في سداد دينه ومنحه مبلغ لبدء مشروعه الصغير وبعد عدة ايام يبدا بالاتصال على الديوان للاستفسار عن البرقيه وفي كل مره يخبره الموظف بأنها مازالت تحت العرض وتمر عدة ايام على خالد وساميه لايأكلون فيها سوى وجبه واحده كل يومين ويحضر ماء من المسجد يروي عطشهم .
اكمل خالد سنتين وموضوعه مازال تحت العرض!!!
توفي ابوه مقهوراً وموضوعه مازال تحت العرض!!!
باع منزل والده بسعر زهيد لسداد ديونه ولم يكفي المبلغ لسداد كل ديونه وسكن شقه مشتركه مع خمس عوائل في حي الدخل المحدود وموضوعه مازال تحت العرض!!!
رغم ظروفه القاسيه ساميه لم تستغني عنه وظلت تخدمه وموضوعه مازال تحت العرض!!!
لمن يريد الوقوف مع خالد ومساعدته ماديا فعليه أن……………. ينسى لان خالد شخصيه وهميه..ورغم واقعية ماحدث له حتى لو بالغت لكن يظل شخصيه وهميه من الواقع ولو فكرنا في مساعدته ماديا فلن تكفي نقودكم لمساعدته لان صديقنا خالد ليس خالد واحد ولاعشرة وانما اعداد كبيره من الخولدز< جمع خالد حصلت لهم ظروف مشابهه لخالد مع اختلاف الاسباب فمنهم من كانوا يعيشون في ستر وعافيه فانكب عليهم اعصار مساهمات الشركات الوهميه ونفضهم ثم جائهم اعصار سوق الاسهم ونفضهم ومازالو يرتشفون اعصار ارتفاع الاسعار الخيالي .
منهم من خسر ماله ومنهم من خسر ماله وصحته ومن من خسر ماله وصحته وحياته .
والمصيبه التي يندى لها القلب وتدمع لها الاعين بان المتسببين في انهيارات المواطنين مازالو يتمرغدون في حياتهم الرغيده .
خالد لم يدخل الاسهم ولم يساهم في الشركات الوهميه ولكن نفضه اعصار الظلم دون ان يقترف اي ذنب
الحمدلله على كل حال
وصية خالد قبل وفاته : بلادي وإن جارت علي عزيزة….وأهلي وإن بخلوا علي كرام .

- النهايه -

 

 

من مواضيع TE TO في المنتدى

__________________

هذا مو غرور الي تشوفونه هذي عزة نفسي في ابسط حلاتي



TE TO غير متواجد حالياً   رد مع اقتباس

قديم 09-27-2010, 04:35 PM   #3
 
الصورة الرمزية أســـــ الحرمان ــــير
 
تاريخ التسجيل: Jan 2009
الدولة: أم الدنيا
المشاركات: 25,074
أســـــ الحرمان ــــير is on a distinguished road
افتراضي

قصه رائعه

تسلم أيدك تيتو

موفق بإذن الله ... لك مني أجمل تحية .

 

 

من مواضيع أســـــ الحرمان ــــير في المنتدى

أســـــ الحرمان ــــير غير متواجد حالياً   رد مع اقتباس

قديم 09-27-2010, 05:33 PM   #4

عضو مميز

 
الصورة الرمزية TE TO
 
تاريخ التسجيل: Mar 2010
المشاركات: 3,320
TE TO is on a distinguished road
افتراضي

يسلموووو علي الرد الفوق رائع

تحياتي مع خالص احترامي

 

 

من مواضيع TE TO في المنتدى

__________________

هذا مو غرور الي تشوفونه هذي عزة نفسي في ابسط حلاتي



TE TO غير متواجد حالياً   رد مع اقتباس

إضافة رد

مواقع النشر (المفضلة)

جديد قسم نهر القصص والحكايات

أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة
Trackbacks are معطلة
Pingbacks are معطلة
Refbacks are معطلة



الساعة الآن 11:42 PM.


Powered by vBulletin® Version 3.8.8
Copyright ©2000 - 2019, Jelsoft Enterprises Ltd.
SEO by vBSEO 3.6.1
:: جميع الحقوق محفوظة لمنتديات نهر الحب ::

Security team

 

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 51 52 53 54 55 56 57 58 59 60 61 62 63 64 65 66 67 68 69 70 71 72 73 74 75 76 77 78 79 80 81 82 83 84 85 86 87 88 89 90 91 92 93 94 95 96 97 98 99 100 101 102 103 104 105 106 107 108 109 110 111 112 113 114 115 116 117 118 119 120 121 122 123 124 125 126 127 128 129 130 131 132 133 134 135 136 137 138 139 140 141 142 143 144 145 146 147 148 149 150 151 152 153 154 155 156 157 158 159 160 161 162 163 164 165 166 167 168 169 170 171 172 173 174 175 176 177 178 179 180 181 182 183 184 185 186 187 188 189 190 191 192 193 194 195 196 197 198 199 200 201 202 203 204 205 206 207 208 209 210 211 212 213 214 215 216 217 218 219 220 221 222 223 224 225 226 227 228 229 230 231 232 233 234 235 236 237 238 239 240 241 242 243 244 245 246 247 248 249 250 251 252 253 254 255 256 257 258 259 260 261 262 263 264 265 266 267 268 269 270 271 272 273 274 275 276 277 278 279 280 281 282 283 284 285 286 287 288 289 290 291 292 293 294 295 296 297 298 299 300 301 302 303 304 305 306 307 308 309 310 311 312 313 314 315 316 317 318 319 320 321 322 323 324 325 326 327 328 329 330